Siemens və Nvidia yeni nəsil PCB keyfiyyətə nəzarət sistemi üzərində işləyir. Məqsəd – AOI (avtomatik optik inspeksiya) avadanlığını elə hazırlamaqdır ki, o, defektləri hələ ilk real plata istehsal olunmamışdan əvvəl tanıya bilsin.
Bu yanaşmanın əsasında rəqəmsal əkiz konsepsiyası dayanır. Siemens Teamcenter platanın konstruksiyası, komponent siyahısı və yerləşməsi barədə məlumatları toplayır. Process Preparation X bu məlumatları yoxlayır və birləşdirərək yığılmış PCB-nin tam rəqəmsal modelini yaradır. Bu modeldən “qızıl plata” – istehsal xəttindəki məmulatlarla müqayisə ediləcək virtual etalon nümunə formalaşır.
İnspeksiya və ya yığım üçün hazırlanmış yaşıl PCB yığımı — Şəkil: JayHand / Wikimedia Commons, CC BY-SA 3.0
Daha sonra Nvidia Cosmos plataların fotorealist sintetik təsvirlərini generasiya edir – həm normal, həm də müxtəlif istehsal qüsurları ilə. Bu təsvirlər AOI sistemlərinin əvvəlcədən təlimi və kalibrlənməsi üçün istifadə olunur. Beləliklə, kamera və görüntü analizi alqoritmləri real platalar xəttə çıxmazdan əvvəl potensial defektləri tanımağı “öyrənir”.
İstehsal zamanı adaptiv nəzarət
Sistem yalnız start mərhələsində deyil, kütləvi istehsal zamanı da kömək edir. AOI şübhəli sahə aşkar etdikdə, əlavə AI modul həmin zonanı analiz edir və bunun real defekt, yoxsa yalnış həyəcan olduğunu qiymətləndirir. Bu, yalnış siqnalların təxminən 40% azalmasına və birinci keçiddə uğurla testdən çıxan məmulatların payının artmasına yönəlib.
Siemens bu həlli Almaniyadakı Siemens Electronics Factory Erlangen zavodunda sınaqdan keçirir. Şirkət iddia edir ki, texnologiya optik inspeksiya proqramlarının hazırlanmasında əl əməyini 85% azaltmağa və fiziki nümunə gözləmədən yeni plata variantlarını xəttə tez çıxarmağa imkan verəcək.
Mənbə: iXBT
