Google və Synaptics yeni bir sinif mikrokontroller təqdim edib – xMCU. İlk nəsil Astra SR200 seriyası klassik MCU-ları tətbiq prosessorlarına yaxınlaşdırır: heterogen hesablama, Google Coral NPU, inteqrasiya olunmuş yüksək ötürücülü xüsusi DRAM və yüzlərlə megabayta qədər genişlənən yaddaş – hamısı tək çipdə.
Arxitektura və AI imkanları
Ailənin mərkəzində Synaptics Torq AI engine və inteqrasiya olunmuş Coral NPU dayanır. Bu NPU aşağı gecikməli, yüksək səmərəli CNN, transformer və tam əlaqəli şəbəkələr üçün optimallaşdırılıb. Açıq mənbəli MLIR/IREE compiler vasitəsilə TensorFlow, PyTorch kimi standart framework-lərdən model gətirmək mümkündür – ayrıca, qapalı toolchain tələb olunmur.
Əsas xüsusiyyətlər:
- 800 MHz-ə qədər yüksək performanslı nüvə (idarəetmə, multimedia, burst-compute)
- Səmərəlilik nüvəsi (həmişə aktiv sensor fusion, aşağı güclü inference)
- Opsional Cadence Tensilica HiFi 5 DSP (audio və akustik ML)
- Həmişə aktiv domen (səs aktivliyinin aşkarlanması, vaxt, oyanma)
Yaddaş arxitekturası 8 MB-a qədər SRAM və yüzlərlə MB-a qədər miqyaslana bilən xüsusi, yüksək ötürücülü DRAM kombinasiyasına əsaslanır. Bu DRAM tipik sistem DRAM-ı ilə müqayisədə təxminən 3 dəfə az güc sərf edir və çox hallarda xarici yaddaşa ehtiyacı aradan qaldırır.
Seriyalar, interfeyslər və hədəf tətbiqlər
Astra SR200 ailəsi pin-uyğun üç xəttdən ibarətdir:
- SR210: ~200 GOPS – aşağı güclü, həmişə aktiv səs və sensor tətbiqləri
- SR230: ~300 GOPS – əlavə vision, displey və opsional audio ilə əsas multimodal qurğular
- SR250: ~400 GOPS – ikiqat vision və displey yolu ilə premium Edge AI sistemləri
Bütün xətlər Arm Cortex‑M85 və Cortex‑M52 kombinasiyasını, inteqrasiya olunmuş görüntü və audio bloklarını, həmçinin PSA Level 3 və CC EAL4+ hədəfli çoxqatlı təhlükəsizlik mühərrikini birləşdirir (hardware izolasiya, kripto sürətləndiricilər, secure boot və s.).
Periferiyalar:
- USB 2.0, UART, SPI, I2C, I3C, PWM, çoxsaylı aşağı güclü GPIO
- Yüksək sürətli octal SPI, SDIO, eMMC yaddaş interfeysləri
- Sənaye variantlarında 1 Gb Ethernet (IEEE 1588 TSN) və iki CAN‑FD magistralı
Platforma Zephyr RTOS və açıq mənbəli Torq NPU compiler dəstəyi ilə gəlir. Hədəf sahələr: AI wearables, batareya ilə işləyən sensor qurğular, ağıllı kameralar, streamer-lər, sənaye vision və səs sistemləri. Embedded.az oxucuları üçün bu, Linux və xarici DRAM tələb etmədən multimodal Edge AI layihələri qurmağa imkan verən maraqlı bir MCU platformasıdır.
Mənbə: Electronics Weekly
